CONCORSO LETTERARIO "V.PATERNO'-TEDESCHI" EDIZ.XIX: LE POESIE PRIME CLASSIFICATE SEZ. LINGUA SICILIANA
- Dettagli
- Categoria: Corsi e Concorsi
- Creato Mercoledì, 30 Agosto 2017 06:03
- Pubblicato Mercoledì, 30 Agosto 2017 06:03
- Scritto da Administrator
- Visite: 1995
I PREMI (Foto di Gianni De Gregorio)
LIRICA PRIMA CLASSIFICATA
LU CARRETTU DI LA VITA di Gaetano Petralia(Catania)
Mi veni ogni ghiornu chiu’ pisanti
tirari lu carrettu di la vita,
sentu d’attornu lastimi ogni istanti
ca m’alargunu ancora la firita.
Pi mia, non c’è ‘ne oggi e n’è dumani,
cu lu sidduni a la carina dura
fazzu la vita mia comu lu cani
di comu agghiorna finu a quannu scura.
La me tistera china di pinseri
la primavera non la fa ciuriri;
pari, ca vaiu avanti, e vaiu arreri
e non finisci mai lu me suffriri.
E tiru, tiru, tiru lu carrettu
e sentu chiù pisanti lu sidduni
finu a quannu lu cori ‘ntra lu pettu
duna a la vita l’urtimu assaccuni.
°°°°°°°°°°°°°°°°°°°°°°°°°°°°°°°°°°°°°°° °°°°°°°°°°°°°° °°°°°°°°°°°°°°°°°°°° °°°°°°°°°°°
LIRICA SECONDA CLASSIFICATA
LU SULI PO’ TURNARI di Antonio Pedone(Castellammare del Golfo, Tp)
Ivi stu jornu a lu campusantu
Me patri era ddà ca m’aspittava.
Nni la cappella di stu locu santu
trasivi e, di na botta, mi taliava.
Mi dici chi canusci li me peni,
tutti li cosi storti e mpirugghiati;
mi dici ca m’assisti e mi susteni
e nun mi lassa certu strati strati.
Mi dici d’aspittari la chiaria,
(la vita n’atru versu po’pigghiari)
c’è la spiranza di na migghiurìa,
lu suli, comu prima, po’ turnari.
Me matri poi m’affaccia risulenti,
m’abbrazza, mi ncuraggia, m’accarizza,
mi dici d’un pinsari a lu prisenti,
di fari paci cu la cuntintizza.
Allura, chiù sirènu e cunfurtatu,
tornu a la casa letu nna lu cori,
abbrazzu, cu lu sguardu, lu criàtu
e la mattàna s’alluntana e mori.
°°°°°°°°°°°°°°°°°°°°°°°°°°°°°°°°°°°°°° °°°°°°°°°°°°°°°°°°°°°°°°°°°°°°°°° °°°°°°°°°°°°°°°°°
LIRICA TERZA CLASSIFICATA
LU ME PAISI di Vincenzo Vitale(Castellammare del Golfo, Tp)
E’ veramenti beddru stu paisi
chi tanti genti vennu a visitari;
Amiricani, Russi e puru Nglisi:
a tutti quanti li fa nnammuràri!
L’hannu cantatu pueti divini,
l’hannu pittatu artisti di valuri:
hannu arristatu cu’ li petti chini
di suli, mari, virdi e tanti odùri.
Lu Gurfu, lu Casteddru, la Banchina;
Portu, Pitròlu, Timpa, e puru Cerri;
‘na vota c’era la Vasca Riggina
dunni chi ora ci su cimentu e fèrri.
Cu’ ccà ci nasci, quasi un si nn’adduna
di quantu è furtunatu pi distinu:
chi si li po’ gustari ad una ad una
sti cosi chi li fici Diu divinu.
Ma cu’ è chi di ccà sinn’jiu luntanu,
nni fa gran cuntu di sti cosi beddri,
e brama arrè tuccàlli cu’ li manu
prima chi a la stranìa lassa la peddri.
Perciò cu havi sennu di raggiùni
po’ essiri cuntentu e beddru cori:
di ‘stu paisi ci abbàsta n’agnùni
pi stàricci di vivu e quannu mori!
